135. А будет кто беспоместной и безвотчинной или иноземец кормовой, или кто ни буди, похвалится на кого смертным убийством в очи, или за очи, и тот, на кого он похвалиться, учнет на него государю бити челом, и на него дати суд, а с суда сыскати. Да будет в сыску обыскные люди скажут по челобитчике, и по тому сыску того, кто на кого похвалится убийством, вкинути в тюрму на три месяцы. А как он в тюрме те урочныя месяцы отсидит, и на него тому, на кого он похвалялся, взяти запись за его рукою в том, что ему над тем, на кого он похвалялся, впредь никакова дурна не учинити. А будет он, в том дав на себя запись, сворует, того на кого он похвалялся убиет до смерти, и его самого казнити смертию же. А будет кто на кого в похвальбе смертнаго убойства учнет государю бити челом, а сыскати про то неким, и им в том дати суд, а с суда учинити указ, до чего доведется.
136. А будет кто на ком учнет искати бою и грабежу, и ответчик в бою не запрется, а про грабежь скажет, что не грабил, и на нем велети исцу за увечье и за безчестие доправити против окладу вдвое, а в пене его, что государь укажет. А в грабеже указ им учинити по судному делу, до чего доведется. А будет тот ответчик в грабеже не запретъся, а про бой во ответе скажет, что он не бивал, и на нем велети грабежь доправити против исковой челобитной и отдати исцу. А в пене тому ответчику, что государь укажет. А в бою указ учинити по суду же, до чего доведется. Да и во иных делех будет кто ответчик на суде против чьей исковой челобитной учнет винитися не во всем иску, и на них велети правити то одно, в чем они учнут винитися, а в чем винитися не учнут, и в том указ чинити по суду же, до чего доведется.
137. А приставныя памяти исцом подавати за своими руками, и как дьяк ту память подъпишет, и ту память записати в книгу того же числа, в котором числе память будет подписана. А записав в книгу, отдати ту память приставу, а ему по той памяти сыскав ответчика дати на поруки, и к суду ответчику срочити безволокитно. А котораго ответчика в городе пристав не сыщет, и приставу по того ответчика итти к его двору, и по приставной памяти дати его на поруку к суду потому же безволокитно.
138. А будет которой ответчик учнет у пристава укрыватися, и во дворе у себя не учнет сказыватися, и приставу, взяв с собою товарыщей, стеречь у двора его день и два и три. Да как тот ответчик сам, или человек его, или дворник з двора сойдет, и того ответчика, или человека его, или дворника, приставу взяв, привести в приказ, и сказати про него судьям, а судьям его по тому же велети дати на поруки к суду.
139. А будет пристав по приставной памяти ответчика, или его людей поймает у ворот его, или где на улице, и станет по нем просити поруки к суду, или поведет его в город, и тот ответчик, или человек его у пристава отобьются, и приставу в том месте, где они у него отобьютъся, являти на них окольним людем, и имена окольним людем записав, подати в приказе судьям за своею рукою. А судьям велети теми окольними людьми сыскати. Да будет окольныя люди в сыску скажут, что они то видели, как тот ответчик и люди его у пристава отбилися, и судьям по того ответчика послати подьячего от места доброго, да с ним того же пристава, кто по него ходил, и велети им, не доходя его двора, взяти с собою понятых, тутошних сторонних людей, сколько человек пригоже, и с теми понятыми велети им итти к нему на двор, и на дворе ему приставную память вычесть, и выговорити ему, что он то учинил негораздо, от пристава отбилъся, и по приставной памяти поруки по себе не дал; а выговоря ему, велети его по приставной памяти приставу дати к суду на поруки, а бес поруки его не отпускати. Да будет он поруки по себе не даст и в город не пойдет, и в свое место не пошлет, учинится приставу силен, и отбивъся от пристава, с Москвы събежит в вотчину или в поместье, и у него взяти з двора людей его или дворника, и велети их дати на поруку, что им того своего боярина поставити в приказе на срок, и в том им дати поверстной срок по указу. Да будет те люди по себе поруки съберут, и им велети быти до сроку за поруками. Да будет тот их боярин для их в приказе объявится, и на него исцу дати суд по челобитной, а что он государева указу не послушал, поруки не дал, и отбивъся у пристава, с Москвы бегал, и за то ему учинити наказание, вкинути на неделю в тюрму, да на нем же велети исцу доправити проести и волокиты с того числа, которое в приставной памяти написано, неделю спустя, да по то число, как он на Москве объявится, по гривне на день.
140. А будет по тех людех, которые после его взяты будут в приказ з двора его, поруки не будет, и тех его людей держати в приказе до тех мест, как он сам объявится. А будет он не объявится долгое время, хотя тем исца своего изволочити, а истец учнет бити челом, чтобы по него в поместье его или в вотчину послати пристава. И по него в поместье его или в вотчину послати пристава, и велети его приставу привести ко ответу к Москве с собою вместе за поруками, а как пристав к Москве его привезет, и ему за ослушание учинити наказание, что государь укажет, а исцу на него дати суд, и по суду указ учинити, до чего доведется, да на нем исцу доправити проесть и волокиты по гривне на день без суда, с того числа, как по него приставная память подписана, неделю спустя, да по то число, как его привезут к Москве, да па нем же велети доправити недельщику езд по указу.
141. А будет тот ответчик у пристава и в деревне ухоронитъся, или учинитъся силен, и приставу в его место привести с собою человека, или его християнина за поруками же. А будет у кого людей и християн нет и взяти ему с собою будет не кого, и приставу о том в приказе подати доезд свой за своею рукою. А судьям по той доездной памяти по того ослушника послати в другие иного пристава, а к воеводе в тот город, где тот ослушник живет, послати государева грамота, чтобы воевода на того ослушника приставу дал стрельцов и пушкарей и затинщиков, сколько человек пригоже, чтобы приставу было с кем такова ослушника изымати. Да как пристав того ослушника изымав, к Москве приведет, и тому ослушнику за его ослушание учинити наказание, бити батоги, да на нем же доправити исцу проесть и волокита по указу и недельщиков езд без суда, и отдати исцу; а в и(ы)ску на него исцу дати суд, и по суду указ учинити, до чего доведетъся. А будет такой непослушник учинит такъже и в третьие у пристава ухорониться, или учинитъся приставу силен, a опосле того он сыщеться, и на нем исцов иск и проесть и волокита по указу, и приставу езд доправити без суда, и отдати исцу, да его же бити батоги, и вкинути на месец в тюрму.
142. А будет по которого ответчика по исцову челобитью послан будет пристав с наказною памятию, в которой город или в уезд, или кого ответчика велят судьи сыскати на Москве по приставной памяти, и поставити к суду, или для какова ни буди дела, или к кому пристав, или сын боярской послан будет с государевыми грамотами, о каком деле ни буди, и тот, по кого послан будет пристав с наказною и с приставною памятию, или тот, к кому пристав послан будет с государевыми грамотами, учнет того пристава, или сына боярского бити сам, или велит кому его бити мимо себя людям своим или християном, или кому ни буди, или у него наказную и приставную память, или государевы грамоты отоимет и изъдерет, и тем он приказных людей, от которых тот пристав послан будет, обезчестит, а сыщется про то допряма, и такова непослушника за государеву грамоту бити кнутом, и посадити в тюрму на три месецы, а недельщику велеть на нем доправити безчестие и увечие против окладу въдвое.
А будет с тем недельщиком будут в понятых сторонния люди, и тот, по кого тот неделыцик послан будет. и сторонних людей учнет бити и безчестити, и на нем по тому же велети приставу и сторонним людем доправити безчестие, да убытки их въдвое по сыску, что у кого взято будет.
А кто недельщика или понятых побиет досмерти, а сыщется про то допряма, и того убойца самого казнити смертию же, а кабальныя долги побитых взяти с поместья его и с вотчин и с животов.
А будет приставу или понятым учинится какое безчестие, или бой от людей и от християн того, по кого тот пристав и понятые посланы будут, а самого его втепоры не будет, а пристав или понятые в том учнут на него бити челом на самого, а не на людей, ни на християн его, а он учнет сказывати, что он про то ничего не ведает, и им в том дати суд. Да будет по суду и по сыску про то дело сыщется допряма, что его люди и християне того пристава и понятых били, и тем его людем и християном за то учинити наказание, бити кнутом, да на них же доправити битым приставу и понятым убытки их въдвое по сыску.
143. А будет пристав или понятые на тех людей, по кого они посланы будут, такое дело, что их били и безчестили, или скажут, что они учинилися силны, затеют напрасно, и сыщется про то допряма, что им те люди, на кого они учнут бити челом, никакова безчестия не учинивали, и за такое затейное ложное челобитье пристава и понятых бити кнутом, да на понятых же за то взяти в государеву казну пени по два рубли на человеке, чтобы на то смотря иным неповадно было ни на кого напрасно бити челом и затевати.
